Yapon və Azərbaycanlı iş adamları biznes müqavilələri imzalayıblar Tokioda Azərbaycan Respublikasının Prezidenti İlham Əliyevlə Yaponiyanın İmperatoru Akihitonun görüşü olmuşdur. Bu iki ölkə arasındakı tarixi dostluq əlaqələrindən söhbət açan İmperator, Azərbaycan ilə münasibətlərin möhkəmləndirilməsinə Yaponiya dövlətinin xüsusi maraq göstərdiyini vurğulamışdır. Xoş sözlərə, göstərilən qonaqpərvərliyə görə Əlahəzrət Akihitoya təşəkkürünü bildirən Prezident İlham Əliyev Yaponiyaya ilk rəsmi səfər etməsindən çox məmnun olduğunu söyləmiş, Azərbaycanda hüquqi, demokratik, dünyəvi dövlət quruculuğu sahəsində görülmüş işlərdən danışmışdır. Prezident İlham Əliyev bildirmişdir ki, Azərbaycan dünya ölkələri ilə bütün sahələrdə qarşılıqlı və faydalı əməkdaşlığın inkişaf etdirilməsinə daim diqqət yetirir. Bu baxımdan Yaponiya ilə əlaqələrə xüsusi önəm verilir. President Azərbaycanın qapılarının dünya ölkələrinin iş adamlarının üzünə həmişə açıq olduğunu bildirmişdir. Prezident martın 8-də Tokioda, onun üçün ayrılmış iqamətgahda Yaponiya Beynəlxalq Əməkdaşlıq Agentliyinin prezidenti xanım Sadako Oqatanı da qəbul etmişdir. Yaponiya Beynəlxalq Əməkdaşlıq Agentliyi ilə Azərbaycan arasında yaranmış əlaqələrdən razılığını ifadə edən dövlət başçısı bildirmişdir ki, bu iki ölkə arasında əməkdaşlığın genişləndirilməsi üçün yaxşı imkanlar və perspektivlər vardır. Söhbət zamanı Azərbaycanla Yaponiya Beynəlxalq Əməkdaşlıq Agentliyi arasında əməkdaşlığın perspektivləri barədə geniş fikir mübadiləsi aparılmışdır. Səfər çərçivəsində, həmçinin Azərbaycan-Yaponiya iqtisadi forumu da keçirilmişdir.